बारामती तालुकास्तरीय आदर्श शिक्षक पुरस्काराने सौ. संगीता रविंद्र जाधव मॅडम यांचा गौरव

संपूर्ण राज्यामध्ये विकासाच्या वाटचालीमध्ये ‘बारामती पॅटर्न’ हा शब्द खूप प्रचलित झाला आहे. प्रत्येक क्षेत्रामध्ये बारामतीची प्रगती होत असताना शैक्षणिक क्षेत्रातील शिक्षक मंडळी देखील या वाटचालीत महत्त्वाचे योगदान देत आहेत.

विद्यार्थ्यांच्या व्यक्तिमत्त्व विकासासाठी आणि त्यांच्या आयुष्याला योग्य दिशा देण्यासाठी कार्यरत असलेल्या प्रत्येक शिक्षक बंधू-भगिनींचे योगदान निश्चितच कौतुकास्पद आहे.

सन २०२२ ते २०२६ या सलग पाच वर्षांतील गुणवंत शिक्षक पुरस्कार यावेळी एकत्रितपणे प्रदान करण्यात आले. बारामती पंचायत समिती व पुणे जिल्हा परिषदेची मागील टर्म सन २०२२ मध्ये संपल्यानंतर स्थानिक स्वराज्य संस्थांच्या निवडणुका झाल्याने या पाच वर्षांतील पुरस्कार एकत्रित प्रदान करण्यात आले.

महाराष्ट्र राज्याच्या विद्यमान उपमुख्यमंत्री सन्माननीय श्रीमती सुनेत्रावहिनी अजितदादा पवार यांच्या शुभहस्ते पुरस्कार प्रदान करण्यात आला. यावेळी पुणे जिल्हा परिषदेचे अध्यक्ष सन्माननीय वीरधवल जगदाळे तसेच बारामतीतील विविध संस्थांचे मान्यवर पदाधिकारी उपस्थित होते.

सौ. संगीता रविंद्र जाधव मॅडम यांनी शिक्षण क्षेत्रात केलेल्या उल्लेखनीय कार्याची दखल घेत त्यांना हा पुरस्कार मिळाल्याने जिल्हा परिषद प्राथमिक शाळा, मुरूम परिवारात आनंदाचे वातावरण आहे.

विद्यार्थ्यांप्रती असलेली आपुलकी, शिक्षणातील सातत्यपूर्ण प्रयत्न आणि विद्यार्थ्यांच्या सर्वांगीण विकासासाठी केलेले कार्य यामुळे त्यांना मिळालेला हा सन्मान शाळेसाठी विशेष अभिमानाची बाब आहे.

पुरस्कार सोहळ्याचे आयोजन

या पुरस्कार सोहळ्याच्या आयोजनासाठी बारामती तालुका पंचायत समितीचे सभापती किरण तावरे, गटविकास अधिकारी किशोर माने आणि गटशिक्षणाधिकारी निलेश गवळी तसेच जिल्हा परिषद व पंचायत समिती सदस्य, सर्व कर्मचारी आणि प्राथमिक शिक्षकांचे सहकार्य लाभले.